დარეგისტრირდი კლიმატის დატათონზე!

კლიმატის ცვლილება კაცობრიობისა და გარემოსთვის ერთ-ერთი უმთავრესი გამოწვევაა. ადამიანის არამდგრადი საქმიანობისა და რესურსების არარაციონალური მოხმარების შედეგად, უკვე ხილულია კლიმატის ცვლილების ნეგატიური შედეგები. მათგან აღსანიშნავია, დედამიწის საშუალო ტემპერატურის წლიდან წლამდე მატება, ყინულის საფარის დნობა, ზღვის დონის აწევა, ქარიშხლების, წყალმოვარდნების, მეწყრების, გვალვების და სხვა მოვლენების გახშირება, ასევე, საფრთხის ქვეშ დგება სუფთა წყლის, მოსავლისა და სხვა ბუნებრივი რესურსების მარაგები. ნავარაუდებია, რომ 2050 წლამდე ეს მოვლენები 2 მილიარდი ადამიანის სიცოცხლეზე მოახდენს გავლენას. კლიმატის კრიზისის ნეგატიური შედეგები მწვავედ აისახება მოწყვლად ჯგუფებსა და ქვეყნებზე.

საქართველო, მიუხედავად კლიმატის კრიზისის გამწვავებაში მისი შედარებით მცირე წვლილისა, საკმაოდ მოწყვლადია მისი შედეგებისადმი. ბოლო 25 წლის განმავლობაში, ქვეყანაში საშუალო წლიური ტემპერატურა 1.3 გრადუსით გაიზარდა. ეს მცირე რიცხვი ეკოსისტემაში დიდ ცვლილებასთანაა დაკავშირებული. დროთა განმავლობაში ხშირდება მოვლენები, როგორებიცაა წყალდიდობა, მეწყერი, გვალვა, ტყის ხანძრები, ძლიერი ქარი, რაც აზიანებს არსებულ ინფრასტრუქტურას და იწვევს ეკონომიკურ და ადამიანურ დანაკარგს.

გერმანიის საერთაშორისო თანამშრომლობის საზოგადოება (GIZ), ფორსეტთან (ForSet), AskGov-თან, ქლაიმით ბეიზიქსთან (Climate Basics) და კავკასიის რეგიონულ გარემოსდაცვით ცენტრთან (REC Caucasus) თანამშრომლობით, სტატისტიკოსებს, დიზაინერებს, დეველოპერებს, კომუნიკაციის სპეციალისტებს, მკვლევრებს, მონაცემებითა და კლიმატის ცვლილებით დაინტერესებულ ადამიანებს გიწვევთ კლიმატის დატათონზე – ქვეყანაში კლიმატის ცვლილების საკითხის გარშემო მონაცემების ვიზუალიზაციის კონკურსზე, რომელსაც უკვე მეორედ ვმასპინძლობთ.  

◾️ რას მოიცავს კლიმატის დატათონი?

სამდღიანი ღონისძიების ფარგლებში, 2-3 ადამიანისგან შექმნილი გუნდები და ინდივიდუალური მონაწილეები მენტორებთან ერთად იმუშავებენ მონაცემთა ვიზუალიზაციის შექმნაზე, გამარჯვებული გუნდ(ებ)ი კი, ფულად პრიზს მიიღებენ.

დატათონის კვირა დატვირთული იქნება სხვადასხვა ტრენინგითა და ვორკშოპით მონაცემთა ვიზუალიზაციისა და საქართველოში კლიმატის ცვლილების თემატიკაზე. ტრენინგებში მონაწილეობის მსურველებმა თვალი ადევნეთ ForSet-ის, AskGov-ის და ქლაიმათ ბეიზიქის ფეისბუქის გვერდებს.

◾️ რა საკითხებს უნდა ფარავდეს შექმნილი პროდუქტი?

წლევანდელი დატათონის  თემატური მიმართულებებია:

– კლიმატის ცვლილების გამომწვევი სათბურის აირების შემცირება (ტყის რესურსები და ენერგოეფექტურობა, ტრანსპორტი, განახლებადი ენერგია, ნარჩენების მართვა, ენერგოეფექტური მშენებლობა, ინდუსტრია, მეცხოველეობა, ტურიზმი, ჯანდაცვა)  

– კლიმატის ცვლილებასთან ადაპტაცია (სოფლის მეურნეობა და სასურსათო უსაფრთხოება, ბიომრავალფეროვნება და ეკოსისტემების კონსერვაცია, მყინვარები, სანაპირო ზოლი, წინასწარი გაფრთხილების სისტემები, ინფრასტრუქტურა, კლიმატ მედეგი ურბანული დაგეგმარება, ჯანდაცვა, ტურიზმი)  

– კლიმატის ცვლილების სოციალურ-პოლიტიკური და ეკონომიკური ასპექტები (ცნობიერება, გენდერი, მოწყვლადი ჯგუფები, მიგრაცია, სამართლიანი ტრანზიცია, მედია, კლიმატ-აქტივიზმი, პოლიტიკა, მმართველობა, საკანონმდებლო ჩარჩო, მწვანე ეკონომიკა, ცირკულარული ეკონომიკა, მწვანე სამუშაო ადგილები).

ამ მიმართულებების ირგვლივ, 12 ოქტომბერს, მონაცემთა ბაზას გამოგიგზავნით. შენი გამოწვევა იქნება, რომ ჩამოთვლილი მიმართულებიდან ერთ-ერთი აირჩიო და მონაცემების გამოყენებით, მასალებიც სწორედ შერჩეული თემის გარშემო შექმნა.

◾️ დატათონის ფარგლებში შექმნილი პროდუქტი შეიძლება იყოს:

– ინტერაქციული ვიზუალიზაცია;
– ინფოგრაფიკა;
– თამაში;
– ქვიზი;
– ანიმაციური ვიდეო;
– სხვ.

გაითვალისწინე, შემოქმედებითობა და ახალი ფორმების ძიება მაქსიმალურად წახალისებულია.

ვიზუალიზაციის შექმნისას, შეზღუდული არ ხარ სასურველი ხელსაწყოს გამოყენებაში ან ვიზუალიზაციის ფორმის შერჩევაში. Მონაწილეობა შეგიძლია მიიღო ინდივიდუალურად ან გუნდთან ერთად.

◾️ რა არის საპრიზო ფონდი?

საპრიზო ფონდი 10 000 ლარს შეადგენს. რამდენი გამარჯვებული გამოვლინდება, დამოკიდებულია შემოსული აპლიკაციების საერთო რაოდენობაზე და დასრულებული პროექტების ხარისხზე.

კლიმატის დატათონი იმართება 19-21 ოქტომბერს, ციფრულად.

კლიმატის დათატონის დავალება და საჭირო მონაცემთა წყაროების ბაზა საჯაროდ გამოქვეყნდება არაუგვიანეს 12 ოქტომბრისა.

კითხვების შემთხვევაში, დაგვიკავშირდით – lela@forset.ge ან jubo@forset.ge

შეავსე რეგისტრაციის ფორმა 11 ოქტომბრამდე: https://forms.gle/urqfYxaipauTohh38

---

ღონისძიებას წვლილი შეაქვს პროექტებში: “კლიმატის პოლიტიკის შესაძლებლობების განვითარება სამხრეთ-აღმოსავლეთ ევროპაში, სამხრეთ კავკასიასა და ცენტრალურ აზიაში, ფაზა მესამე” (CDCPIII), და „საქართველოში ტყის სექტორის რეფორმის განხორციელების ხელშეწყობა – ECO.Georgia”, რომლებიც ფინანსდება გერმანიის გარემოს დაცვის, ბუნების კონსერვაციის, ბირთვული უსაფრთხოებისა და მომხმარებელთა დაცვის ფედერალური სამინისტროს (BMUV) და გერმანიის ეკონომიკური თანამშრომლობისა და განვითარების ფედერალური სამინისტროს მიერ და ხორციელდებაგერმანიის საერთაშორისო თანამშრომლობის საზოგადოების (GIZ) და საქართველოს გარემოს დაცვისა და სოფლის მეურნეობის სამინსიტროს ერთბლივი ძალისხმევით.